ಹೆಂಡತಿಗೆ ಸಂಬಳ : ದುಡಿಯುವ ಗಂಡಂದಿರ ತಳಮಳ
ಈ ಕುರಿತು ಪ್ರಕಟವಾದ ಲೇಖನಕ್ಕೆ ವ್ಯಂಗ್ಯ, ಆಕ್ರೋಶ, ತಮಾಷೆಭರಿತ ಪ್ರತಿಕ್ರಿಯೆಗಳನ್ನು ನೀಡಿರುವ ಓದುಗರು, ಕೇಂದ್ರ ಸರಕಾರವನ್ನು ತುಘಲಕ್ ಸರಕಾರಕ್ಕೆ ಹೋಲಿಸಿದ್ದು, ಇಂಥ ಕಾನೂನ್ನು ಕೇಂದ್ರ ಯುಪಿಎ ಸರಕಾರವೇನಾದರೂ ತಂದರೆ ಅದರ ಬುಡಕ್ಕೆ ಕೊಡಲಿ ಏಟು ಬೀಳಲಿದೆ ಮತ್ತು ಇದು ಸಂಸಾರವೆಂಬ ದೋಣಿಯನ್ನು ಬಿರುಗಾಳಿಗೆ ಸಿಲುಕಿಸಲಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
"ಅಲ್ರೀ, ಇವರಿಗೇನಾದರೂ ತಲೆ ಇದೆ ಏನ್ರೀ. ತಿಂಗಳ ಎಲ್ಲ ಸಂಬಳವನ್ನು ತೆಗೆದುಕೊಂಡು ಹೋಗಿ ಹೆಂಡತಿ ಕೈಯಲ್ಲಿ ಕೊಡ್ತೀನಿ. ಅವಳೇ ನನಗೆ ಪಾಕೆಟ್ ಮನಿ ಅಂತ ಕೊಡ್ತಿದ್ದಾಳೆ. ಅಂಥದ್ದರಲ್ಲಿ ಅವಳಿಗೆ ಸಂಬಳ ಬೇರೆ ಕೊಡಬೇಕಾ? ಇವರೇನು ತಮಾಷೆ ಮಾಡ್ತಾ ಇದ್ದಾರಾ? ಸಂಸಾರದ ಬಗ್ಗೆ ಕಾನೂನು ರಚಿಸುವವರಿಗೇನಾದರೂ ಗೊತ್ತಾ? ಇಂಥ ಕಾನೂನು ತರುವ ಮೊದಲು ನಮ್ಮಂಥವರನ್ನು ಏನಾದರೂ ಕೇಳಿದ್ದಾರಾ?" ಅಂತ ಆಟೋ ಚಾಲಕ ನಾಗರಾಜು ಅವರು ವ್ಯಕ್ತಪಡಿಸಿದ್ದಾರೆ.
ಗಿರೀಶ್ ನಂಜನಗೂಡು ಎಂಬುವವರು, "ನಿಬಿರು (ಪ್ರಳಯ) ಬಂದ ಮೇಲೆ ಹೆಂಡತಿಗೆ ಸಂಬಳ ಕೊಟ್ಟರಾಯಿತು" ಎಂದು ವ್ಯಂಗ್ಯವಾಗಿ ಹೇಳಿದ್ದರೆ, ಸುರೇಶ್ ನಟರಾಜನ್ ಎಂಬುವವರು, "ಇಂಥ ಕೆಲಸಕ್ಕೆ ಬಾರದ ಕಾನೂನು ತರಲು ಸರಕಾರಕ್ಕೆ ಸಮಯವಿದೆ. ಆದರೆ, ಭ್ರಷ್ಟಾಚಾರ ನಿರ್ಮೂಲನೆ ಮಾಡಲು ಸಹಾಯವಾಗುವ ಲೋಕಪಾಲ ಮಸೂದೆ ಮಂಡಿಸಲು ಸಮಯವಿಲ್ಲ" ಎಂದು ವ್ಯಂಗ್ಯಭರಿತ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ರವಿ ಎಂಬುವವರು, "ಇಂದಿನ ದಿನದಲ್ಲಿ ಹೆಂಡತಿ ಪೂರ್ತಿಯಾಗಿ ಮನೆಗೆಲಸ ಎಲ್ಲಿ ಮಾಡ್ತಾಳೆ. ಮನೆಗೆಲಸದವರನ್ನು ಇಟ್ಟುಕೊಂಡಿರುತ್ತಾರೆ. ಅಡುಗೆಮನೆ ಕೆಲಸ ಮಾಡಲು ಅತ್ತೆ (ಅಮ್ಮ) ಇರುತ್ತಾಳೆ. ಇನ್ನು ಹೆಂಡತಿ ಪಿಚ್ಚರು, ಕ್ಲಬ್ಬು, ಪಾರ್ಟಿಗಳಂತ ಟೈಂ ಪಾಸ್ ಮಾಡುತ್ತಿರುತ್ತಾರೆ. ಸಂಬಳ ಕೊಡಬೇಕಿದ್ದರೆ ಅಮ್ಮನಿಗೆ ಕೊಡಬೇಕೇ ಹೊರತು ಹೆಂಡತಿಗಲ್ಲ" ಎಂದು ಎಲ್ಲ ಗಂಡಂದಿರ ಪ್ರತಿನಿಧಿಯಂತೆ ಮಾತನಾಡಿದ್ದಾರೆ.
ಡಿ.ಪಿ. ಕೋಡಿ ಎಂಬ ಫೇಸ್ ಬುಕ್ ಸ್ನೇಹಿತರು, "ಈ ಕಾನೂನು ಜಾರಿಗೆ ತಂದರೆ ದಾಂಪತ್ಯದಲ್ಲಿ ಬಿರುಕು ಬೀಳುವುದರಲ್ಲಿ ಸಂದೇಹವಿಲ್ಲ. ಇದರಿಂದಾಗಿ ವಿಚ್ಛೇದನಕ ಕೇಸುಗಳು ಕೂಡ ಜಾಸ್ತಿಯಾಗುವ ಸಾಧ್ಯತೆಯಿದೆ. ಇದು ಹುಚ್ಚಾಟಿಗೆಯ ಕಾನೂನು. ಇದನ್ನು ನಾನು ಸರ್ವಥಾ ಒಪ್ಪುವುದಿಲ್ಲ. ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಜೋಕ್ ಮಾಡುತ್ತಿಲ್ಲ ತಾನೆ? ಸಂಸಾರ ಹೇಗೆ ಸಾಗಿಸಿಕೊಂಡು ಹೋಗಬೇಕು ಎಂಬುದನ್ನು ಅವರವರಿಗೇ ಬಿಡಬೇಕೇ ಹೊರತು ಸರಕಾರ ಮೂಗು ತೂರಿಸಬಾರದು." ಎಂದು ಚಾಟಿ ಬೀಸಿದ್ದಾರೆ.
"ಮನೆಯಲ್ಲಿ ದುಡಿಯುವ ಹೆಂಡತಿಗೆ ಬೇಕಾದಷ್ಟು ಹಣವನ್ನು ಕೊಡಬೇಕಾಗಿರುವುದು ಗಂಡನ ಧರ್ಮ. ಅದನ್ನು ನಾವು ಕೊಟ್ಟೇ ಕೊಡುತ್ತೇವೆ. ಸರಕಾರ ಹೇಳಿದ್ದಕ್ಕಿಂತ ಹೆಚ್ಚಿಗೆಯೇ ಕೊಡುತ್ತೇವೆ. ಆದರೆ, ಈ ಕಾನೂನಿನ ಹಿಂದೆ ಯಾವುದೇ ತರ್ಕವಿಲ್ಲ. ಇದು ಪ್ರಾಕ್ಟಿಕಲ್ ಕೂಡ ಅಲ್ಲ. ಇದರಿಂದ ಅನವಶ್ಯಕ ಭಿನ್ನಾಭಿಪ್ರಾಯಗಳು ಉದ್ಭವವಾಗುವುದರಲ್ಲಿ ಸಂದೇಹವಿಲ್ಲ" ಎಂದು ವಿನಯ್ ಶಿರಸಿ ಎಂಬ ಸ್ನೇಹಿತರೊಬ್ಬರು ತಮ್ಮ ಮನದಾಳದ ಇಂಗಿತವನ್ನು ವ್ಯಕ್ತಪಡಿಸಿದ್ದಾರೆ.
ಕೇಂದ್ರ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಕೇಂದ್ರ ಸರಕಾರಕ್ಕೆ ಗಂಡ ಹೆಂಡತಿಗೆ ಸಂಬಳದ ಶೇ.10ರಿಂದ 20ರಷ್ಟು ಹಣವನ್ನು ಸಂಬಳವಾಗಿ ನೀಡಬೇಕು ಎಂದು ಶಿಫಾಸರು ಮಾಡಿದೆ. ಕೇಂದ್ರ ಸಚಿವ ಸಂಪುಟದ ಮುಂದೆ ಈ ಕರಡುಪ್ರತಿ ಮಂಡನೆಗೆ ಸಿದ್ಧವಾಗಿದೆ. ಸಂಬಳವನ್ನು ಹೆಂಡತಿಯ ಬ್ಯಾಂಕ್ ಖಾತೆಗೆ ಜಮಾ ಮಾಡಬೇಕು ಎಂದು ಶಿಫಾಸರು ಮಾಡಿದೆ.
ಹೊರಗಡೆ ಕೆಲಸ ಮಾಡುವ ಅನೇಕ ಗಂಡಂದಿರು ಮನೆಯಲ್ಲಿ ಕೆಲಸ ಮಾಡುವ ತಮ್ಮ ಹೆಂಡತಿಗೆ ಅಗತ್ಯವಿದ್ದಷ್ಟು ಹಣವನ್ನು ನೀಡುವುದು ಎಷ್ಟು ನಿಜವೋ, ಅಗತ್ಯವಿದ್ದಷ್ಟು ಹಣ ನೀಡದೆ ಹೆಂಡತಿಯನ್ನು ಸತಾಯಿಸಿ ಆಕೆಯ ಜೀವನವನ್ನು ನಾಯಿಪಾಡು ಮಾಡುವ ಗಂಡಂದಿರು ಇರುವುದೂ ಅಷ್ಟೇ ಸತ್ಯ. ಹಣವನ್ನೂ ಉಳಿಸಿಕೊಳ್ಳುತ್ತ ಸಂಸಾರವನ್ನು ಸುಗಮವಾಗಿ ಸಾಗಿಸಿಕೊಂಡು ಹೋಗುವ ಜಾಣ್ಮೆ ಗಂಡಸಿಗಿಂತ ಹೆಂಡತಿಗೆ ಜಾಸ್ತಿ ಎಂಬುದನ್ನು ಅನೇಕರು ಒಪ್ಪುತ್ತಾರೆ. ಆದರೆ, ಸರಕಾರ ತರಲು ಉದ್ದೇಶಿಸಿರುವ ಕಾನೂನಿನಿಂದ ಸಂಸಾರದ ತೊಡಕುಗಳಿಗೆ ಪರಿಹಾರ ದೊರಕಿಸಿಕೊಡಲು ಸಾಧ್ಯವೆ? ಇದಕ್ಕೆ ಮನೆಯಲ್ಲಿ ದುಡಿಯುವ ಹೆಂಡತಿಯರು ಏನು ಹೇಳುತ್ತಾರೆ?