PF ಹಿಂಪಾವತಿ ಇನ್ನು ಆನ್‌ ಲೈನ್ ಮೂಲಕ!

ನವದೆಹಲಿ. ಏ. 18: ಇದೇ ಸೆಪ್ಟೆಂಬರಿನಿಂದ ತನ್ನ ಎಲ್ಲಾ ಚಂದಾದಾರರಿಗೂ ಆನ್‌ ಲೈನ್ ಮೂಲಕವೇ ಸರ್ವ ಸೇವೆಗಳನ್ನು ಒದಗಿಸಲು ನೌಕರರ ಭವಿಷ್ಯ ನಿಧಿ ಮಂಡಳಿಯು (ಇಪಿಎಫ್ಒ‌) ಸರ್ವ ಸಜ್ಜಾಗಿದೆ.

ಅಂದರೆ Employees' Provident Fund Organisation ಸಂಸ್ಥೆಯು ಸೆ. 1ರಿಂದ ತನ್ನೆಲ್ಲ ವಹಿವಾಟು ಪಾವತಿಗಳನ್ನು ನೇರವಾಗಿ ಇ-ಪಾವತಿ ಮೂಲಕ (e-payment) ನೆರವೇರಿಸಲಿದೆ. ಸದ್ಯಕ್ಕೆ ಶೇ. 93ರಷ್ಟು ಸೌಲಭ್ಯಗಳು ಆನ್‌ ಲೈನ್ ಮೂಲಕ ವರ್ಗಾವಣೆಯಾಗುತ್ತಿವೆ.

ಸಂಸ್ಥೆಯು ಸುಮಾರು 44 ಲಕ್ಷ ಪಿಂಚಣಿದಾರರಿಗೆ ಪ್ರತಿ ತಿಂಗಳು ಪಿಂಚಣಿಯನ್ನು ಪಾವತಿಸುತ್ತದೆ. ಪಿಂಚಣಿ ಮಾಹಿತಿಗಳ ಡಿಜಿಟಲೀಕರಣ ಮೂರು-ನಾಲ್ಕು ತಿಂಗಳಿನಲ್ಲಿ ಮುಕ್ತಾಯವಾಗಲಿದೆ. ಅದಾಗುತ್ತಿದ್ದಂತೆ ಪ್ರತಿ ತಿಂಗಳೂ ಪಿಂಚಣಿಯನ್ನೂ ಸಹ ಆನ್‌ ಲೈನ್ ಮೂಲಕ ಪಡೆಯಬಹುದಾಗಿದೆ.

ಆನ್‌ ಲೈನ್ ಪದ್ಧತಿಯಲ್ಲಿ ಹಣ ಪಾವತಿಸುವುದರಿಂದ ಸಂಸ್ಥೆಯ ಕಾರ್ಯದಕ್ಷತೆ ಹೆಚ್ಚಲಿದ್ದು, ಪಾರದರ್ಶಕತೆಯೂ ಏರಲಿದೆ ಮತ್ತು ಕಾಗದ ಪತ್ರಗಳ ಹೊರೆ ಗಣನೀಯವಾಗಿ ತಗ್ಗಲಿದೆ. (PTI)