ಭಾರತದ ಕೆಂಪು ಮೆಣಸಿಗೆ ಸೌದಿ ಸರ್ಕಾರ ನಿಷೇಧ
ರಿಯಾದ್, ಮೇ. 12: ಯುರೋಪಿಯನ್ ಒಕ್ಕೂಟ ದೇಶಿಯ ಆಲ್ಫಾನ್ಸೊ ಮಾವಿನ ಹಣ್ಣಿನ ಆಮದಿಗೆ ನಿಷೇಧ ಹೇರಿದ್ದೇ ತಡ ಈಗ ಸೌದಿ ಸರ್ಕಾರ ಕೆಂಪು ಮೆಣಸಿನ ಮೇಲೆ ನಿಷೇಧ ಹೇರಲು ಮುಂದಾಗಿದೆ.[ಭಾರತದ ಮಾವಿನ ಹಣ್ಣಿಗೆ ಯುರೋಪಿನಲ್ಲಿ ನಿಷೇಧ]
ಭಾರತದಿಂದ ಆಮದು ಮಾಡಿಕೊಂಡ ಕೆಂಪು ಮೆಣಸಿನ ಕಾಯಿಯಲ್ಲಿ ನಿಗದಿತ ಪ್ರಮಾಣಕ್ಕಿಂತ ಹೆಚ್ಚಿನ ಪ್ರಮಾಣದ ಕೀಟನಾಶಕದ ಅಂಶ ಪತ್ತೆಯಾದ ಹಿನ್ನೆಲೆಯಲ್ಲಿ ನಿಷೇಧ ಹೇರುವುದಾಗಿ ಸೌದಿ ಅರೇಬಿಯಾ ಕೃಷಿ ಸಚಿವಾಲಯ ಹೇಳಿದೆ.
ನಿಷೇಧ ಕುರಿತು ಈಗಾಗಲೇ ಸೌದಿ ಸಚಿವಾಲಯ ಭಾರತದ ಕೃಷಿ ಮತ್ತು ಸಂಸ್ಕರಿತ ಆಹಾರೋತ್ಪನ್ನಗಳ ರಫ್ತು ಅಭಿವೃದ್ಧಿ ಪ್ರಾಧಿಕಾರಕ್ಕೆ (ಎಪಿಇಡಿಎ) ಮಾಹಿತಿ ನೀಡಿದ್ದು, ಮೇ.30 ರಿಂದ ಈ ಆದೇಶ ಜಾರಿಗೆ ಬರಲಿದೆ.
ಕೆಂಪು ಮೆಣಸನ್ನು ಭಾರತದಿಂದ ಆಮದು ಮಾಡಿಕೊಳ್ಳುವ ಐದನೇ ಅತಿ ದೊಡ್ಡ ರಾಷ್ಟ್ರ ಸೌದಿ ಅರೇಬಿಯಾ ಆಗಿದ್ದು, 2013 ಏಪ್ರಿಲ್ ನವೆಂಬರ್ ಅವಧಿಯಲ್ಲಿ 18 ಕೋಟಿ ಮೌಲ್ಯದ 1,81,500 ಟನ್ ಕೆಂಪು ಮೆಣಸನ್ನು ಭಾರತ ರಫ್ತು ಮಾಡಿತ್ತು.[ಸೌದಿಯಲ್ಲಿ ಹೆಚ್ಚಾಗುತ್ತಿದೆ ಎಂಇಆರ್ಎಸ್ ಸೋಂಕು]
ಈಗಾಗಲೇ ಆಲ್ಫಾನ್ಸೋ ಮಾವಿನ ಮೇಲಿನ ನಿಷೇಧದಿಂದಾಗಿ ಈ ತಳಿಯ ಮಾವಿನ ಹಣ್ಣಿನ ಬೆಲೆ ಇಳಿಕೆಯಾಗಿದೆ. ಎಪಿಇಡಿ ಈಗಾಗಲೇ ಸೌದಿ ಸಚಿವಾಲಯದ ಜೊತೆ ಮನವೊಲಿಕೆ ಮಾಡುತ್ತಿದ್ದು, ಮನವೊಲಿಕೆ ವಿಫಲವಾದಲ್ಲಿ ಕೆಂಪು ಮೆಣಸಿನ ಬೆಲೆ ಮಾರುಕಟ್ಟೆಯಲ್ಲಿ ಗಣನೀಯ ಪ್ರಮಾಣದಲ್ಲಿ ಕುಸಿಯುವ ಸಾಧ್ಯತೆಯಿದೆ.