ಮೈಸೂರು ದಸರಾಗೆ ಏಳೂವರೆ ಸಾವಿರ ಕೆಂಪು ಬಸ್

ಮೈಸೂರು, ಆ.26: ಈ ಬಾರಿ ಮೈಸೂರು ದಸರಾ ಸರಳವಾಗಿ ಆಚರಿಸಿದರೂ ಹೆಚ್ಚು ಜನರನ್ನು ಆಕರ್ಷಿಸುವಂತೆ ಮಾಡಲಾಗುವುದು. ರಾಜ್ಯದ ವಿವಿಧೆಡೆಗಳಿಂದ ಬರುವ ಪ್ರವಾಸಿಗರ ಅನುಕೂಲಕ್ಕೆ ಹೆಚ್ಚುವರಿ ಬಸ್ ವ್ಯವಸ್ಥೆ ಕಲ್ಪಿಸಲಾಗುವುದು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಎಸ್ ಎ ರಾಮದಾಸ್ ಹೇಳಿದ್ದಾರೆ.

ಸುಮಾರು 7,500 ಬಸ್ ಗಳನ್ನು ದಸರಾ ವಿಶೇಷವಾಗಿ ರಸ್ತೆಗೆ ಬಿಡಲು ಕೆಎಸ್ ಆರ್ ಟಿಸಿ ನಿರ್ಧರಿಸಿದೆ. ರಾಜ್ಯದ ವಿವಿಧೆಡೆಗಳಿಂದ ಹಾಗೂ ನೆರೆ ರಾಜ್ಯಗಳಿಂದಲೂ ದಸರಾ ವಿಶೇಷ ಬಸ್ ಗಳು ಹೊರಡಲಿದೆ.

KSIC ಪ್ರಾಯೋಜಕತ್ವ: ಶತಕದ ಸಂಭ್ರಮದಲ್ಲಿರುವ ಕರ್ನಾಟಕ ರೇಷ್ಮೆ ಕೈಗಾರಿಕಾ ನಿಗಮ, ಮೈಸೂರು ದಸರಾದ ಪ್ರಮುಖ ಪ್ರಾಯೋಜಕನಾಗಿ ಪಾಲ್ಗೊಳ್ಳಲಿದೆ. ಈ ಬಗ್ಗೆ KSIC ಅಧ್ಯಕ್ಷ ಸಚಿವ ಬಚ್ಚೇಗೌಡರೊಡನೆ ದಸರಾ ಸ್ವಾಗತ ಸಮಿತಿ ಮಾತುಕತೆ ನಡೆಸಿದೆ.

ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ಪ್ರತ್ಯೇಕ ಚಲನಚಿತ್ರೋತ್ಸವ ಆಯೋಜನೆ ರೂಪುರೇಷೆಗಳಿಗೆ ಅಂತಿಮ ಸ್ಪರ್ಶ ನೀಡಲಾಗುತ್ತಿದೆ. ಮುಖ್ಯಮಂತ್ರಿ ಡಿವಿ ಸದಾನಂದಗೌಡರು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಉದ್ಘಾಟಿಸಲಿದ್ದಾರೆ ಎಂದು ರಾಮದಾಸ್ ಹೇಳಿದರು.